انا فیلی

من زغر سني وانه مصروع الحزن ردت ولو مرٌه اهلال الفرح ماهلٌ لي
والدهرحطني ابفراگین القهر؛ محطات العمراهموم ، بیچ خیر یروحي ودللي
صحت يوبه يا ريل لا وين هالسچه، اشو تصیح وتزعر خلگ چلمه ما تردلي جاوبني ابخجل بطل ونينك لاتطش الملح عله جروحي ترانه مامور اومبتلي
اسكتت اوعبراتي بالصدر خنگه، یهز بیه الریل كاروك ونغم حسبالك صوت الوالده لمن تلولي
خذنی الواهس وغفيت غفيت وانه ابطرگ حلم وردي ، مدري الحلم سومري لو بابلي
گلت یاریت من حلمي لاصحيت اوعسه ليل الهوه عليه يطول او ماينجلي
لچن هيهات، الضيم ما فارگ الروح وانتي یابسمه ادخيلچ یمته یمر طیفچ ولو رشة نده علشفه تبللي
شرداسولف ومدري منين ابدي ،تدري ابعرس اليتيم ماتلگه مطبج ولا دگة ياردلي
شترجه منه بعد، كلهه جدر یخني اوچم گرصة خبز او يلله يايمه هلهلي
الله ياديرة چلي،الله ياديرةهلي يمته الگاچ وبیچ افک حزني الشايله سنين ويمته بترابچ اخدودي اخلي
واردود هم اهوس وهم ادبج وهم اغنیلچ وانتی هم کون اي رقيب تغنیلی
ابعيده نفط خانه غادي عل حدود تلگاهه ما بین خانقین ومندلي
ناسهه فقره وغلابه واليديرنه هم چان رجال طیب الله یرحمه اسمه حجي سوزعلي
عود ابويه چان یشتغل بالنفط ذاک الوکت العامل یسمونه کولي
چنت سنتين لو تلاثه من العمر بعدني ما ضگت الحنان صفینه ابلا معین ولاولي
مات ابويه او رحل وماتت الضحچه بعیوني او مشوار صعب جدام هلبت كون ا شد حيلي
والسماء والطارق بس الله فوگ او من مال الدنیه عدنه چم صخله وطلي
وچماله کل عاشور حصه لبوالیمه حسین فدوه کون الوالده تنحر طلي
ارضيت ابثوب الحزن گلت ولچ ياروحي داري تلگیت المر هيت لك هيت لي
گلت قسمه وغصبن علي ارضه چا قابل هل گمر یظل وره الغیم ابد للتالي
عفيه يتيم او ما كفاك واردود كوردي او مذهبك شيعي ولك لا حاكم يقبلك ولا يحميك ولي
صحت یویل انه موش عراگي مثلكم عمر زاد وملح ما خزر چا شنهي الجنيته بلله اشو گلي
گال يزي تلف وادور، الکوردي لون مذهبه شيعي خطرومحسوب علل فيلي
واحنه انخاف منه گوي ، واذا صعب عنده شي صاح یداحي الباب ابو زينب علي
وهناك ارحلت وللولايه تعنيت بلچن باليوم شغل والمدرسه احطهه دوام ليلي
اي والله الگیتهم ربع سمر رایتهم حمر لن بیهه چاکوش ابویه ومنجلي
اطربت عله سوالفهم واعلگت بالصواني شموع وللحزب بوسه وگلت انه لك وانته لي
وياهم وياهم، ركضيت وهوسيت ، او وياهم غنيت احنه مشينه للحرب واطربت على حس العتابه ونايلي
ولك لا وين يفلان كوردي شيعي فيلي شيوعي چا هیه چیله چیلتین لوصارت رشاشه وصلي
ياوسفه خدمت الدين جني سماني خدمت اخويه الچبیر دار وجهه عني ومالفاني
خدمت الوطن عجمي ناداني ذبني عل حدود انه وزماني وانه مدري الطريج امنين
لا وين اروحن يربي ولاوين اولي
عجل انته هم وطن سموك شباب ازهور بالحجزوديت من غير غسل وچفن دفنیت
او حته عله گبورهم نیشان ممخلي
وهناك العیم تلگونه عرب ملخ خور چرا اومدي باید هرچه ما بگیم تو بگی بلي
شرد اسولفلك یابعد روحي وانه اباخر محطه من العمر وادري الراح مني بعد ما ردلي
ا شوطاح الصنم او مدري ليش دنيانه لسه مظلمه اومطفيه قناديلي
چاوین دشداشه ابصبغ نيلي لاوین تسامرنه انه وخلي او وینهه بلله یسمره هلهلي
کل هذا واگولن عندي امل ماطول الي حزب يحميني ما انحني قيد انملي ها تريد تعرف وترید ادليك على اسم الحزب انتو حزبي انتو الكوردي الفيلي
بالحزب ا نه گوي واظل گوي واصيح ابعالي الصوت انه فيلي انه فيلي انه فيلي

ابراهيم جهان بخش
السويد في 10 - 5 - 2006