انا فيلی

من زغر سني وانه مصروع الحزن ردت ولو مرٌه اهلال الفرح ماهلٌ لي
والدهرحطني ابفراگين القهر؛ محطات العمراهموم ، بيچ خير يروحي ودللي
صحت يوبه يا ريل لا وين هالسچه، اشو تصيح وتزعر خلگ چلمه ما تردلي جاوبني ابخجل بطل ونينك لاتطش الملح عله جروحي ترانه مامور اومبتلي
اسكتت اوعبراتي بالصدر خنگه، يهز بيه الريل كاروك ونغم حسبالك صوت الوالده لمن تلولي
خذنی الواهس وغفيت غفيت وانه ابطرگ حلم وردي ، مدري الحلم سومري لو بابلي
گلت ياريت من حلمي لاصحيت اوعسه ليل الهوه عليه يطول او ماينجلي
لچن هيهات، الضيم ما فارگ الروح وانتي يابسمه ادخيلچ يمته يمر طيفچ ولو رشة نده علشفه تبللي
شرداسولف ومدري منين ابدي ، تدري ابعرس اليتيم ماتلگه مطبج ولا دگة ياردلي
شترجه منه بعد، كلهه جدر يخني اوچم گرصة خبز او يلله يايمه هلهلي
الله ياديرة چلي، الله ياديرة هلي يمته الگاچ وبيچ افک حزني الشايله سنين ويمته بترابچ اخدودي اخلي
واردود هم اهوس وهم ادبج وهم اغنيلچ وانتی هم کون اي رقيب تغنيلی
ابعيده نفط خانه غادي عل حدود تلگاهه ما بين خانقين ومندلي
ناسهه فقره وغلابه واليديرنه هم چان رجال طيب الله يرحمه اسمه حجي سوزعلي
عود ابويه چان يشتغل بالنفط ذاک الوکت العامل يسمونه کولي
چنت سنتين لو تلاثه من العمر بعدني ما ضگت الحنان صفينه ابلا معين ولاولي
مات ابويه او رحل وماتت الضحچه بعيوني او مشوار صعب جدام هلبت كون ا شد حيلي
والسماء والطارق بس الله فوگ او من مال الدنيه عدنه چم صخله وطلي
وچماله کل عاشور حصه لبواليمه حسين فدوه کون الوالده تنحر طلي
ارضيت ابثوب الحزن گلت ولچ ياروحي داري تلگيت المر هيت لك هيت لي
گلت قسمه وغصبن علي ارضه چا قابل هل گمر يظل وره الغيم ابد للتالي
عفيه يتيم او ما كفاك واردود كوردي او مذهبك شيعي ولك لا حاكم يقبلك ولا يحميك ولي
صحت يويل انه موش عراگي مثلكم عمر زاد وملح ما خزر چا شنهي الجنيته بلله اشو گلي
گال يزي تلف وادور، الکوردي لون مذهبه شيعي خطرومحسوب علل فيلي
واحنه انخاف منه گوي ، واذا صعب عنده شي صاح يداحي الباب ابو زينب علي
وهناك ارحلت وللولايه تعنيت بلچن باليوم شغل والمدرسه احطهه دوام ليلي
اي والله الگيتهم ربع سمر رايتهم حمر لن بيهه چاکوش ابويه ومنجلي
اطربت عله سوالفهم واعلگت بالصواني شموع وللحزب بوسه وگلت انه لك وانته لي
وياهم وياهم، ركضيت وهوسيت ، او وياهم غنيت احنه مشينه للحرب واطربت على حس العتابه ونايلي
ولك لا وين يفلان كوردي شيعي فيلي شيوعي چا هيه چيله چيلتين لوصارت رشاشه وصلي
ياوسفه خدمت الدين جني سماني خدمت اخويه الچبير دار وجهه عني ومالفاني
خدمت الوطن عجمي ناداني ذبني عل حدود انه وزماني وانه مدري الطريج امنين
لا وين اروحن يربي ولاوين اولي
عجل انته هم وطن سموك شباب ازهور بالحجزوديت من غير غسل وچفن دفنيت
او حته عله گبورهم نيشان ممخلي
وهناك العيم تلگونه عرب ملخ خور چرا اومدي بايد هرچه ما بگيم تو بگی بلي
شرد اسولفلك يابعد روحي وانه اباخر محطه من العمر وادري الراح مني بعد ما ردلي
اشو طاح الصنم او مدري ليش دنيانه لسه مظلمه اومطفيه قناديلي
چاوين دشداشه ابصبغ نيلي لاوين تسامرنه انه وخلي او وينهه بلله يسمره هلهلي
کل هذا واگولن عندي امل ماطول الي حزب يحميني ما انحني قيد انملي ها تريد تعرف وتريد ادليك على اسم الحزب انتو حزبي انتو الكوردي الفيلي
بالحزب انه گوي واظل گوي واصيح ابعالي الصوت انه فيلي انه فيلي انه فيلي

ابراهيم جهان بخش السويد في 10 - 5 -2006

المصدر: صوت العراق، 8/6/2006