مجرد نزاهة ...
رن جرس الهاتف في مكتب احد الموظفين في احد دوائر الدولة .. وعبر سماعة الهاتف سمع
- استاذ ( ) أحنة مكتب النزاهة في الدائرة .. نطلب منك الحضور
- خير استاذ اكو شي ؟
- تعال وانت تعرف ..
أغلق الخط .. ووضع الموظف السماعة وفي رأسه تدور عشرات الافكار .. ترى هل اكتشفوا تلاعبه ؟ ام اكتشفوا سر علاقته بالمقاول الفلاني الذي يورد البضائع الى مخازن دائرته ؟ ام عرفوا بامر
الرشاوي التي يتقاضاها لقاء تمشية معاملات غير اصولية او قانونية .. لم يتمالك نفسه وقال
- قابل اني وحدي الحرامي بهاي الدائرة .. اشو الدائرة كلها حرامية ..
خرج من غرفته وفي راسه تدور فكرة الهرب .. ضب الامتعة والسفر الى أقليم كوردستان حيث لن يسأل عنه احد هناك مادامت لها حكومة خاصة بها .. وقصة ذلك الحواسم الذي أفتدى نفسه من
الجرائم الكبرى بدفترين من الدولارات وهروبه واقامته في الاقليم ماثلة امامه .. ولكنه قبل ان يصل الى الباب الخارجي للدائرة قال لنفسه
- لجنة النزاهة لجنة تحقيقية ..يعني راح يحققون وبس .. خل أشوف اذا الموضوع جديات اكلب للشمال مادام ما عندي جواز .. واذا الموضوع لا فشعندي تارك قن الدجاج الي يبيض ذهب
أتخذ طريقه الى مكتب لجنة النزاهة .. طرق الباب فجاءه الجواب من الداخل
- تفضل ..
دلف الى الغرفة . . فوجد نفسه امام موظف انيق نهض ليرحب به
- تفضل اكعد استاذ( ) ..
- خير استاذ .. خوما كو شي
جلسا قبالة بعض فقال موظف النزاهة ..
- وصلتنا تقارير عنك .. وحجي هواية واحنة تحققنا منها كلها ووجدناها مضبوطة ..
- يعني استاذ اللي كتب التقرير عليه نظيف لو اللي حجة ... هو الدائرة اشو كلها ..
- نعرف كلشي (قاطعه موظف النزاهة بحسم ) وقبلك جانوا موجودين هنا وكعدوا على نفس الكرسي .. أحنة نريد المصلحة .. مجايين أنأذي احد .. بس أحنة نريد حصة من عمولة المقاول هي هاي
صيدتك الجبيرة راح انعوفلك الزغار وانعبرها الك
- اي مقاول استاذ ..
- انت تعرف شأقصد ما اريد اذكرك أنو أحنة متأكدين من كل المعلومات .. عشرين ورقة وينغلق التحقيق
قالها موظف النزاهة بحسم .. فبانت حبات عرق بارد على جبين استاذ ( ) أستدعت ان يخرج منديله ليمسح عرقه ..
- بس استاذ عشرين ورقة الكم هواية .. يعني
- ما أعرف .. عشرين ورقة
- زين خلي اخابره على الاقل
أخرج تلفونه المحمول .. واتصل بالرقم المطلوب
- أهلا أني ( ) .. يابة حجي ترة اني بلجنة النزاهة هسة وهم يعرفون كلشي .. اي أكلك يعرفون كلشي ويريدون عشرين ورقة ويسدون الموضوع .. شنو أنطيهم .. واني .. مو مراح يبقالي شي .. ها
يعني العشرين ورقة اللي راح تدفعها مالها علاقة بفلوسي .. اذا هيج خوش حجي .. اي (يلتفت الى موظف النزاهة ويقول ) يسلم عليكم الحجي ويكول لازم نتعرف
- أكيد راح نتعرف ..
يغلق ( ) هاتفه ويقول
- باجر بتسهيل الله اجيب الفلوس
- وباجر راح ينغلق التحقيق
- هاهي استاذ ..
- الله وياك
ينهض من كرسيه .. ويغادر الغرفة .. فيما عاد موظف النزاهة الى كرسيه وأعاد راسه الى الخلف .. ومن حيث لا يدري برز أمامه ضميره او ما تبقى منه بعد أن همشه لفترة ما .. فقال له الضمير
- ارتاحيت هسة .. راح تجيك عشرين ورقة
- اي ارتاحيت .. بهاي العشرين ورقة وغيرها راح اتحرر من الفقر اللي جنت رابطني بيه انت .. بهاي عشرين ورقة راح ...
- راح ترتاح .. ومو مشكلة غيرك يتعذب .. هاي العشرين ورقة منزوعة من فم فقراء من فم محتاجين و دخلت جيب هذا المقاول أضعاف مضاعفة انطاك منها عشرين
- واني فقير ومحتاج .. راح تجي لفمي مثل ما تكول .. هذا شي يا ضميري العزيز والشي الثاني انو هذا المقاول بكل سهولة يكدر بخمس ورقات ياجر جماعة ويخلولي عبوة ناسفة كدام البيت ..او
يرصدوني حتة يمزقون جسدي بالرصاص أو واحد من الجهال
- تخاف من الموت .. هسة صرت تخاف من الموت .. صدام حسين جان يسوكم بالعصا للموت وما ينطيكم شي ومخليكم على بساط الفقر .. مو بدينا عهد جديد .. جنت اني ضميرك بعهد صدام اكبر
وأقوى .. تذكر المبادىء اللي جنت تحمله .. بس الظاهر جنت تحملها لان السرقة بهذاك العهد محصورة بالطاغية وازلامه وانت وامثلك م جنتوا أزلامه ف م جنتوا تكدرون تسرقون فتسترت خلف
المبادىء والقيم على اساس المثل ( اللي مينوش العنب يكول حرام ) وين الحرام ويني اني جواك
- والله لو تعوفني احسن ترة ضوجتني هواية
- وتعيش بلا ضمير ..
- مثل كل الناس
- لا .. مثل امثالك وانتم قلة بنص الناس بس أفعالكم وصيتكم تخلي الناس تشوفكم هواية .. ارجع الي ارجوك
يطرق الباب .. فيقول
- تفضل
يدخل موظف .. ويقول وهو يرسم ابتسامة على شفته ويقدم يده الحاملة لظرف اسمر
- أسف استاذ .. هذا اللي طلبته مني
- أنت ياهو منهم .. ؟! ترة نسيتك
- أني ابو العشر اوراق استاذ
فيصرخ الضمير متوجعا وينهار الى الارض
علي الكلاواي
ali_alkalaway@yahoo.com
17/11/2005